Schöt n jungske kaant daal

t Mot wa hoast nen hearfstign zundag in 1967 hebn wes. Dootieds reagn en weain t in t noajoar dag noa dag. Iej wösn nog woar a’j an too warn. t Eerste van Unisson, een van de twee voetbalklubs oet Bokel, spöln ne weendnatte partiej tieegn PAX oet t Gelderse Hengel. Pax steet in t Latien vuur vrea. Da’s nog es wat aans as t Voetbal is oorlog van Rinus Michels. Mer PAX oet Hengel is neumd noar n meark schoonsmeer. Sekretaris en schoonnlapper Paul Pleunis kwam in 1929 met den naam ankuiern. 

Van de wedstried wördn de leu in Bokel nich bliej. Unisson verleus dikke, met 6-3. Dat ha der boavn alns met te maakn dat der biej PAX n jong van n joar of zeuvnteen met dee. Hee was better as alle aandre spöllers biej mekaar en maakn vief goals. René Notten zol later naam maakn biej FC Twente, Ajax, Feyenoord en in Oranje. 

Van dizn dreknatn novemberdag is miej wat aans nog meer biejbleavn. Dee eer keump Gerrit Oosterbroek too, t kanon van Unisson. Hee kon t hardste scheetn van alle spöllers in n dreehook Eanske-Hoksebeargn-Hengel. Ok tieegn PAX haaldn e n moal onmeundig oet. Van
n peunt van n 16-meter-rechthook gung t reagnzwoare leer op t PAX-loek opan. Jammer genog gung n bal net nöast. Nog jammerder: n grootn roondn koggel vloog vol op t köpke van n jungske van n joar of zes, zeuven. Het keerlke sloag achteroaver, as raakt duur nen zwieper van Cassius Clay. Merakel boavn merakel stond de jong a gauw wier op de peutjes. Hee hef de wedstried oet könn kiekn.

Wat leu begonn de va van het keend de les te leern: ‘Goa dan ok vuur oew jungske stoan.’ t Weerwoord op dizze gratis road was kloar: ‘Dan zöt hee toch niks!’