Nooit nich op n schoot biej mien

oma Christien

Gertjaan, mien grootvaar van vaars kaant, hef noa a’k wet nich an inteelt doan. Hee wonn in Bokel en trouwn in 1900 met Christien oet Borkelo. In dee tied was dat oet ne aandere weerld. Hoo dat kon? n Joar of tien liedn zag ik in papierngood van de gemeente dat Christina Egelink (Borculo) van augustus 1889 tot mei 1900 meid was in de boerderiej dee noe as ‘Inspiratiehoeve’ duur t leavn geet. Op nog gen vief minuutn loopn van de boerderiej van mien grootvaar. Zee hebt t aait good met mekaar had. Noadat Christien meert 1931 oet de tied was komn, gung t met Gertjaan n zetke luk nöast t pädke. Midweenters leup e snotternd in n besniejdn bongerd noar grouwnetappels te zeukn. Vuur ziene Christien. Mien aandere grootmoor was (Wille)Mina, van Elsgeit. Zee kwam van ne boerderiej met n weenkelke der in. Iej konn der van alns kriegn, van tabak tot tealders, van schoapnwol tot foezel. Den draank haaldn de Elsgeits zölf oet de Pruuske. Heuldn zee zik doar wa an de wet? t Gif te deankn dat zee in t duuster de greans oavergungn met n foezel nich in kleenknde fleske mer in stille vearknsbloazn. Mina is op 8 meert 1889 geboorn. In augustus van dat­zölfde joar gung Christien as wich van 17 joare in Bokel
an t weark. Op nog gen 150 trad van de Elsgeits of. Zoo kan t hoast nich aans of dat miene ene latere oma as buurmeaken mangs nog wa miene aandere oma as klean keend op n schoot hef had. Mina trouwn in 1916 en kwam as nöagstn noaber op zun 200 meter van Christien of te wonn. Dee hef vast wal es met mien moo, geboorn in 1916, op n schoot zetn. Met miej is dat nooit wes. Doo ik op de weerld kwam, röstn Christien al neegnteen joar op n Osseler kearkhof.